 |
| Sampul buku novel KelingKumang dalam bahasa Iban, salah satu yang menyumbangkan rekor MURI ITKK, 5 Agustus 2024. |
Catatan Redaksi:
Mengingat Pembaca media ini kebanyakan warga yang bermukim di wilayah Tmur Kalimantan Barat (Sanggau - Sekadau - Sintang - Kapuas Hulu) yang bukan saja memahami tetapi juga menuturkan Bahasa Iban, Redaksi berpikir: Kenapa tidak memuat bersambung kisah Keling Kumang, Rama-Sinta, dan Romeo-Juliet versi Iban?
Ditulis Masri Sareb Putra dengan penerjemah seorang pakar bahasa Iban, Dr. Patricia anak Ganing, mulai hari ini kisahan Keling Kumang kami muat khusus utntuk Anda.
Selamat mengikuti!
1
Jalai Pendai:
Lemai hari, maya nya sebun mipis
ngayung pun Adau. Lalu ba ujung rumah Panggau Libau, bisi siku pemesai menua
nya datai enggau seput-seput ngusung tuai rumah.
“Minta ampun tuai.” Ku iya lalu
engkundukka tubuh.
Gemuring
Gading ti benung duduk beranyam ba tengah ruai lalu ngetuka pangawa
iya. Ukai sengapa orang ke nemu ngayam sarang beliung ari wi. Naka pangalus
asil anyam iya. Enti deka bulih asil jari ti ngemanah nya, meseti deka ngembuan
pangeliat ati sereta pengangkun. Enda lama agi, maya nebang pan nyau deka datai
sepangudah tembu pangawa nasau.
"Nama
dih, pejalai nuan baka ke bisi mai berita berat"
"Baka
tu tuai". ku pemesai nya bejaku enggau penuh basa tang baka ti ngeluluka
diri sereta berupai amat ulah iya enda menuku.
"Tadi
bisi ayan siku rusa betanduk tujuh bebulu emas. Enda kala rusa baka nya mansa
menua kitai. Enda mukai-mukai pansut ari mua pendai. Lebuh aku ngagai iya, jelu
nya lalu ngelarika diri nuju menua Gelung." Ku Jelayan.
Ninga
berita nya, Gemuring lalu angkat. "Uji tusui nuan enggau silik agi, ni
naka pemadas rusa nya". Ku Gemuring.
"Rusanya
ngembuan tujuh iti tanduk sereta bebulu mas."
"Ah,
bansu ke baka nya. Uji peda nuan ba dinding aku din. Berapa lunsin tanduk rusa
ti udah ulih baka nya." Saut Gemuring Gading lalu nunjukkan baris tanduk
rusa ulih iya ti ditusun badas ba dinding ruai. Kelimpah ari endur begantungka
perengka berega, tanduk rusa nya mega nyadika tanda tikas pangelandik ngasu
beburu. Ukai muntang ngasu jelu siga baka nya.
“Minta
ampun tuai. Rusa tu amat badas sereta nyelai. Tujuh taun aku udah nyaga pangelikun
menua tu, nadai siku rusa ti mansa pendai ulih ngelarika diri ari ditangkap
aku. Tu tadi udah bebendar aku nguji nangkap rusa nya, enda ngira iya idup
tauka mati. Tang mih lepas. Rusanya lenyau maya aku mansa entara enggau menua
Gelung. Aku deka minta pemendar nuan tuai tama ke sempadan menua sida Gelung ngambika
ulih nangkap rusa nya.”
“Kati nuan
udah madahka Keling?” tanya Gemuring. “Iya rindu amat ngasu.”
Keling tu
anak tuai Gemuring, iya nya anak tanda pangerindu asil bekunsi pangidup enggau
bini iya ti benama Simba. Seduai melaki bini tu bisi tiga iku anak. Aka tuai
Keling diberi nama Empaing Aling. Iya udah besai lalu nyadi siku indu ti bajik.
Bala manang ke ngubat Endu Empaing nadai siku mujur lalu ngujungka iya lesi
bebadi maya umur 12 taun ketegal panyakit sampar tauka panyakit burung.
Adi Keling iya nya Dabung, tang takah umur seduai kelalu jauh. Keling jarang
bemain enggau adi iya.
“Minta
ampun tuai. Aku enda berani leluba madahka Keling sebedau nusui ngagai nuan
dulu tuai.”
“Enti
kenya, alai kangauka Keling asuh betemu sereta ngusung aku diatu. Sebedau mata
panas padam, aku nunggu ba pandung.”
Jelayan
betemu enggau Keling ba tengah laman ba ujung rumah sida. Kelimpah ari ngasu, Keling
ngembuan pangerindu bepangka gasing. Mayuh orang ngelaban iya bepangka bepun
ari nembiak redak dataika bujang berani. Pangerindu nya dipurihka ari apai iya.
Ninga cherita
Jelayan senentang rusa nyelai nya, ati Keling berasai gaga. Iya lalu berumban
betemu enggau apai iya ba pandung ruai sida.
"Tabi apai,
tuai rumah. Ngarapka nuan gerai belama.” Keling bejaku enggau basa ngagai apai
iya.
“Duduk mih anak!”
“Au,
padahka dia mih apai. Aku nyikap diri deka mending.
“Anak aku
Keling. Kati nuan udah ninga senentang rusa ke nyelai? Aku deka ngasuh nuan
nangkap lalu manjuk iya. Asai ati aku tu deka nambahka pemayuh tanduk rusa ba
dinding bilik kitai. Uji peda nuan dinding kitai sepiak nyin.” Gemuring
nunjukka dinding ti agi puang.
“Ila gitang
ba din pala rusa ulih nuan nya.”
Enti udah pangerindu, sigi enda ibuh dipinta ngereja iya.
Keling nagunka pala. Ati iya udah kelalu gagit nunggu hari tawas. Keling deka
berumban niti pendai rumah sida Gelung endur iya nyidi rusa nyelai betanduk
tujuh lalu bebulu emas munyika ditusui ngagai iya.
Ketegal nangika nujah entara
lalu tau ngasuh orang rumah sepiak nyangka sida ngintip, Gemuring belalai
ngasuh Jelayan nguluka Kkumangeling ngasu rusanya.
Tumu pagi buta, Keling nurun ari
ruai. Maya ngindik anak tangga, iya ninga bunyi burung ketupung. Munyi burung
ukai mua ari kanan, ukai mega ari kiba. Nangi ga iya, nama kini utai ka dipadahka
burung nya. Tang Keling nyeliahka diri mansik reti bunyi burung nya. “Amat mih
sehari tu aku ulih nangkap rusa nya.”
Kebendar, Keling enda tentu
rindu dientuting orang maya ngasu. Tambahka mega Jelayan balat nyekat iya. Iya
ngasaika diri ukai anak mit ti meseti diperatika belama.
Keling nemu kebuah ngasu apai
iya kelalu irau. Iya nemu diri anak lelaki ke paling tuai peturun tuai rumah.
Apai iya ngembuan besai amat pangarap ngichaka iya ulih nampung pangawa iya.
Nya mih kebuah apai iya seruran irauka pangelikun iya.
Keling seruran
ngasaika Jelayan ngeruga pejalai iya. Iya nguji ninggalka raban sida Jelayan ti
bejalai dulu ari iya. Iya mega enda ibuhka raban bukai ti ngentu ba jalai. Bisi
ke nyumpit burung, bisi mega nya ngasu kijang, bisi mega nya nangkap manuk kampung.
Keling nadai ngembuan pangerindu baka bala ke bukai. Dalam pikir iya sigi
betemu lalu nangkap rusa betanduk tujuh.
Udah ngalih tengah hari, Keling
ngasaika tubuh iya lemi. Kaki iya gegetar. Iya ngasaika diri aus sereta lapar.
Iya pan ngetu ba tebing siti sungai mit. Duduk serayaka belelak. Iya lalu muka
bungkus asi ti dibai. Iya deka makai belaukka garam laban nadai bulih jelu.
Keling tepereningka ba tebing
sungai mayuh wi ti nyerangkap sereta tinggi pun. Iya ngambi duku lalu mantap wi
ti tumbuh ba baruh pun kayu. Iya lalu narit sereta ngulihka upa nya.
Digumpul iya kayu ranggas. Iya
muka lupung lalu ngambi tekik kena ngidupka api. Keling lalu nunu upa. Udah upa
mansau, iya lalu ngupak kulit nya. Naka mih panyamai. Keling lalu makai naka
pemagas.
Sepengudah api padam, asap iya
pan lalu lenyau tama ke dalam babas. Keling ngalika diri baru seraya ngenatka
diri ti udah kenyang. Iya nyandih ba bandir pun Adau. Udahnya iya lalu muka
baju. Nerejunka diri ke dalam sungai ti benung anyut, ai iya chelap laban mayuh
batu alus enggau besai. Bedau lama udah berendam, Keling ngasaika tubuh iya
regas baru.(bersambung)
