Novel Keling Kumang dalam Bahasa Iban (8)

 

Keling nguaka duku iya ti panjai. Ujung kayu api ti benung mau dikena iya nyadika terabai lalu dipegai ba jari kiba iya. Tentu ga antunya takutka api, pia ku pikir Keling

            “Amat naka pemerani nuan. Enda kala kami meda mensia berani sereta kering baka tu!” Ku antu ti agi majak ngelaban nya. Bala antu nya enda tentu sikar belaban ketegal agi ngenatka perut ti kenyang udah makai ikan Semah tadi. Nambahka nya, antu takutka api. Baka petang ti alah laban terang. Antu nya pedis mata sereta mata berasai bepedi maya merening Keling.

"Ampunnn! Anang munuh kami. Minta kasihka nuan. Kami malas lalu meri nuan pengaruh.”

Pengaruh tu jimat tauka perengka ti dikena jampat ngulihka juluk ati. Orang Iban andalka pengaruh tu datai ari menua antu. Enda sengapa orang bulih pengaruh nya, semina orang ti benasit aja. Bala antu ti nguan babas nya meri Keling pengaruh, batu mit ti perenching, kena malas jasa iya laban enda munuh sida.

"Enti nuan megai batu tu, nuan deka meretika semua jaku bansa jelu," ku antu nya.

Keling menerima pengaruh nya lalu mupuk. Iya ngarapka diri jampat tetemuka Laja. Iya bisi tesiumka bau rum sereta nya bau rum buk mensia anggus. Bala antu udah nyingkap diri deka nunu Laja. Laja deka ke lauk sida ti naka penyamai bepun ari ujung buk iya.

Ehm...nya iya siku agi mensia datai deka nyadi pemakai kitai," ku jaku bala antu maya malik Keling.

 "Antu nadai guna!" Ku jaku sumpah Keling meda tudah Laja udah ditangkap lalu deka ditunu. Kaki enggau jari bakih iya nya udah ditanchang ngena wi. Mulut ditejal ngena daun pandan.

"Antu buyan, siku mensia ngelaban 12 iku antu," ku jaku kemeli Keling. Mimit enda mih iya nangi ngelaban bala antu nya. Ba pun aja bala antu ke berani laban deka ngeremba mensia. Tang enti mensia berani sereta tau ajih, bala antu sigi nyembah minta ampun. Ulah antu sigi takutka orang berani, lalu berani enti orang takut, sereta meri jaku pujuk ngagai orang ti ba jalai asa dalam pengidup.

Keling engkechit lalu lengkas iya semak enggau api tunu. Dijengkau iya selumpung kayu ti agi diempa api mau lalu ngena ujung api iya nikau bala antu nya.

"Kami dua belas iku, ngelaban nuan siku lalu kami alah. Pengering nama dikembuan nuan? Lari nuan sereta anang munuh kami. Kami deka meri nuan pengaruh baru!"

"Enggai aku nerima pengaruh ari nuan ti dadak nya!" Ku Keling. Iya pan lalu berumban ngelepaska Laja ti ditanchang ba sigi batu besai, enda jauh ari nya pama engkechit tama ke dalam Sungai. “Sial!” ku dalam ati iya. Bala antu nya ti nangkap Laja tadi.

            Ngena penyikar, Keling jampat ngelepaska Laja ti ditanchang ba kaki enggau jari laban ti deka dipanggang bala antu. Iya lalu ngambi daun pandan ti dikena antu nejal mulut iya ngambika enda ulih manjung minta tulung.

            “Nasit endar ga nuan lengkas datai. Enti enda pia…” Ku Laja seraya murus mua iya.

            “Ba ya, kerebak tawas, antu tu sigi makai nuan!”

            “Antu ukai nya nemu kenyang!”

            “Aram tua, jampat mupuk ari endur tu!”

 Malam pan udah tengah malam lalu deka ngalih kerebak tawas. Keling enggau Laja nyingkap diri laban deka ngejang ari sarang antu nya. Tang mih, baru nyingkang sesingkang dua, seduai iya tedingaka bisi nyawa orang benung berandau. Ari nyawa ti didinga, penyampau tubuh sida engka bisi lebih tiga iku. Kini ke penunga sida nya?

            Maya hari kerebak tawas, sigi bisi orang deka nurun ke pendai. Enti ari agi petang, bala indu dara sigi ngirah beras lalu mai beras nya ngena bakul. Lalu sida seruran dikemataka bala orang bujang.

            Beras ti dikirah nya deka dipanduk enggau lengkas sebedau kerebak tawas, iya nya sebedau orang nurun ke umai. Indu dara ti ngirah beras nya, orang ti sama mandi lemai tadi.

            Keling enggau Laja betemu enggau bala indu ti ngirah beras sereta bala bujang ti ngemataka sida. Ba senawah panchar api kelasau, mata Keling betemu perening enggau siku ari tiga indu dara nya. Bisi pengasai ti balat dibai perening nya lalu tama ngagai atau iya.

            Enti enda silap mata iya, nya mih indu dara ti dipansa iya maya tesat ngasu. Lalu maya nya iya berumban belalai ba pun empelam nangika disebut orang sengaja nengkila, peragam ati iya maya nya engka semina mimpi. Kebendar, ukai antu! Indu dara nya mih ti dipeda lalu dipansa iya.

            “Maya malam ti majak petang tegayam diserayung pun kayu ti gadung, Keling entara andal enggau enda ninga munyi indu utai bemunyi baka ti deka merindang iya.

            Amat kini iya tepedaka indu rumah panjai Gelung, tauka semina mimpi iya entara ngeleda enggau enda.

            “Ari ni penatai nuan bujang?” tanya Indu nya.

            “Ari Panggau Libau,” Ku saut iya.

            “Ari Panggau Libau,” Ku saut bakih iya mega.

            Dua iku orang bujang nya nyaut seretai. Tang mih indu dara ti pengambis bajik nya rindu agi ke orang bujang ti keterubah nyaut iya. Kumang ngasaika diri kala ngelala lelaki nya. Ari apai iya. Apai iya ti meri iya ati ngambika ngelala orang ti amat enggau bula kelebih agi maya beratika orang lelaki.

            Tang nyelai amat, Laja mega rinduka indu nya.“Aihh, nama utai dipeda nuan? Keling nempik bau Laja. Bisi pengasai ninding ba ati iya.

            Iya ti ditempik lalu nyaut, “Nuan dih, nama utai dipeda nuan?”

“Aku tu tepedaka ba atas nyin bisi senaya api terang. Sigi bisi rumah panjai nya ba din.”

            “Ah, bula nuan nya. Nuan deka nguji nguntik indu nyin nih?” Ku laja nunjukka Indu nya.

            Sepengudah sida bekelala, Keling enggau Laja dikelaluka sida bemalam ba rumah panjai Gelung.

Penatai seduai iya diterima lalu disambut naka pemanah ari apai Kumang ti benama Bujang Sebalu. Taja pia, sigi bisi tanya nyelai bai ari peragam ati sida.

“Sapa seduai, ari ni penatai, lalu nama kebuah seduai tama ngagai menua kami? Tanya Bujang Sebalu, iya nya apai Kumang ti nyadi tuai rumah sida ba Gelung.

Keling lalu madahka nama diri. Menya, enti deka madahka nama sereta penatai diri, orang sigi lalu madahka diri anak sapa lalu nerangka peturun diri empu.

“Aku Keling anak Gemuring Gading.”

“Ha…? Anak Gemuring Gading?” Bujang Sebalu lelekah. Ketawa gaga. Iya ngasaika diri naka pengaga.

“Ha… Nama berita? Udah 17 taun tua iya enda betemu sepengudah begulai ngiga buah empelam kedempa bini tua iya. Nama berita bakih aku nya? Ha…?”

            Sida ke bisi datai nunga kia bela alit ati magang. Nadai kala tuai rumah sida gaga amat baka nya. Orang ti lama udah lama ngelala tauka baru ngelala tuai rumah nya sigi enda kala meda iya gaga kenya. Baka ti baru tetemuka segenggam intan.

"Ha ... ha .. haaa ... "Bujang Sebalu ketawa baru. Lalu ngepai bala ngambi datai semak ngagai iya.

“Ngasuh sida ngambik tikai ti pengambis manah. Lalu ambi mega tajau ti ngembuan ai tuak ti pangambis nyamai. Aku gaga amat betemu enggau temuai kitai tu.”

Lalu dianchauka sida tikai ti naka pemanah ba bilik nya. Tikai ti dianchau dipeda bekilat baka tikai peredani dipanchar ayas-ayas api. Bujang Sebalu nunggu tuak dibai ngagai tengah-tengah sida, lalu iya deka nerangka ngagai bala mayuh.

            “Keling, Keling,” Ku iya. “Batang Ipuh ba tengah babas. Diambi anak pun kara. Enti sigi udah nasit. Nurun ngasu betemu indu dara.

            Bala ti bisi datai majak meretika kebuah tuai rumah sida Gelung gaga baka nya. Iya baka ti rindu amat ke orang bujang ti datai ari menua jauh nya.

            Ngelamatu, mayuh bala lelaki ti udah datai nanya anak dara iya, tang mih nadai siku ti asaika patut ba ati iya. Enda nemu nama kebuah, ati iya rindu amat ngagai lelaki ti tesat ngasu nya. Lelaki ti mimit agi deka diempa antu. Lalu lelaki ti ngenduh semalam ba pendai sida nya berasai amat narit ati iya.

Nama Bujang Sebalu sigi ngelala apai Keling? Semua sida ti datai bela melaba magang. Geragayak sida berupai dipeda ari ulah enggau sintak seput sida.

“Enda ibuh mayuh jaku, aku deka nerangka bala mayuh,” Bujang Sebalu nguji nyaut tanya ba pikir bala ti bisi datai.

“Kitai deka rami sehari tu. Aku udah betemu enggau menantu ti udah disabung kenyau ari bedau ada suba ketegal tua apai iya ti bebakih, lalu ketegal apai indai iya udah diambuka bala!”

            Bujang Sebalu nerangka sida senentang kaul seduai apai Keling ti bebakih lalu baka diri sebala. Seduai suba betemu ba babas ti ngembuan penyauh setengah hari ari menua Juar Gembar. Seduai iya bela ngiga buah empelam ti nyadika sera bini seduai ti sama bela benung betubuh bisi.

Lebuh seduai iya malik ke atas, seduai tepedaka semina dua igi buah empelam ba pun. Tang nyelai, seduai iya sama berebutka buat nya. Lalu seduai iya sama baum ngulihka buah nya ke sera bini seduai iya.

            Seduai iya sama bela bulih buah empelam nya. Lalu seduai iya mega besemaya, enti anak ti ada nya ila siku lelaki siku indu, seduai deka disabung jadi. Tang enti nyema sama bela indu, tauka sama bela lelaki anak nya deka bambu diri menyadi.

            Dikena ngamatka sempekat seduai iya ti udah disabung jadi, Keling enggau Kumang deka mantaika gerunung baka buah engkala ti digaga ari temaga. (BERSAMBUNG)