Novel Keling Kumang dalam Bahasa Iban (7)

 

4

Keling Kumang

Kunding malam majak bemunyi. Nya nandaka enda lama agi hari deka belabuh petang. Babas repa ba  sepemanjang  munggu bejuah nganchau panjai dataika ngagai menua tuai. Lalu nya ti ngasuh babas jampat amat petang.

           Munggu Bejuah enda jauh ari Batang Lawai. Mayuh anak sungai ti nuju ngagai sungai ti pengambis panjai ba Borneo.

             Menua nya agi badas amat, mayuh batu sereta ai sungai pan naka penyelap lalu ulih diirup. Tang pengingin deka muai aus sereta meresi diri enda nyadi. Pemanah menua ngasuh iya tebelengga, nya ti ngasuh iya belubah bejalai nengah babas nuju sepun empelam besai ti ulih endur iya ngenduh. Keling nyandih ba pun empelam. Iya majak mikirkan jalai ngiga Laja sebedau hari kerebak tawas.

           Taja Keling bendar mejamkan mata, tang iya nadai ngasaika diri ngantuk. Dia iya ngasaika perut majak lapar. Iya nurun ke sungai enggau niat ati ti deka nangkap Ikan. Maya nya, mensia bedau kelalu mayuh dataika ikan ba sungai sereta burung pan muntang ditangkap. Enti nurun ke sungai maya malam petang, ikan-ikan sigi enda siga baka siang hari.

 

Penampak bulan mega enda umbas dikena meda ikan ti diau diri baka ti benung gali ba rauh batu chelap, belelak baka mensia. Ketegal begunaka penampak ari api, orang Dayak nunu getah kelasau.

           Keling nunu kelasau ti diambi iya ari lupung. Kelasau nya jampat endar ga ambis lalu meseti dikelimat. Keling ngena ujung batang sumpit nyadika jerepang, iya niruk tiga iku ikan semah. Enda lama udah nya Keling madamka api kelasau iya.

           Panchar bulan kembung pansut ba selepak daun ti belah. Iya ngintu ikan ti ulih iya tadi. Disirang iya lalu digerabu iya ngena garam. Udahnya iya lalu nugungka rangkang kayu rangkai sereta ngaga tungku api. Ngena buluh tajam ti sepemesai jari anak, iya nusuk ikan ari atas ke baruh lalu dipanggang.

  Sepiak isi panggang ikan iya udah mansau. Keling lalu ngalihka ikan tunga ari sepiak ke bedau mansau. Enda mukai-mukai iya tedingaka munyi pama, "ek,ok, ek,ok!" Isi pama ti ngembuan darah chelap nya naka penyamai enti nyadi lauk iya malam nya, ku pikir iya. "Ek,ok, wek, perut kreok keok .... "

             Nadai guna, ku pikir Keling. Bunyi pama nya baka ti ngemelika iya. Keling nemu diri empu benung lapar. Nadai mayuh pikir, Keling lalu ngelekaka panggang ikan iya. Ngena teda kelasau ba jari, iya ngiga munyi pama nya.

……"Hmm...naka mih penyamai nya. Pala pama sepemesai genggam jari iya. Pah pama nya sepemesai jari indu iya. Naka mih penyamai enti dipansuh, digulai enggau daun kandis muda. Lebuh maya ujung jerepang Keling deka ngena ba pama, dalam beberapa sikin jelu nya jampat engkechit tama ngagai lubuk lalu nadai temu penunga agi.

Bai ati asa, Keling mulaika diri baru ngagai palan iya ngaga tungku api tadi. Nambahka pengasa iya, ikan banta ti dipanggang iya tadi nadai temu agi.

Kini mih penunga ika banta nya? Iya semina tetemuka buluh mesai jari ti dikena iya nusuk ikan tadi tang ikan nadai temu penunga. Tu sigi bisi jelu lapar ti enchuri nya tauka antu jai ti nganchau iya.

Keling enggai kiruh agi. Ngena teda kelasau, iya nurun baru ngiga ikan. Dia iya pan bulih ikan. Iya nisik lalu manggang ikan baka tadi. Lebuh maya ikan iya deka mansau, dia iya majak ga ninga munyi pama ti ngeregau ati iya. Keling pan ngereja pengawa ti baka digaga iya tadi. Iya pulai mai jari kusung sereta meda ikan panggang iya lenyau baru.

Dataika tiga kali pengawa kenya nyadi. Kelasau iya mega udah lengis, Keling ti lapar udah kelalu tusah ati. Keling ngembuan mayuh penemu, lalu iya deka ngena penemu puchau ngiga penunga ikan nya tadi. Iya lalu duduk belipat kaki. Nyintak seput lalu ngesuhka iya. Keling pan lalu macha puchau iya:

Burung Ketupung ba tanah rata,

Burung Tiong ba langit mingkai

Aku alit ati aku mega lapar

Sapa mih ti enchuri ikan panggang aku.

Sepengudah iya macha punchau nya tadi, Keling muka mata iya. Ari tapa jari iya pansut bala indu semepat. Indu semepat nya mansutka api ti ulih ngasuh iya tepedaka bala antu ti betegaring, ngantu sereta kenyang sepengudah makai ikan panggang iya lalu nadai ninggalka teda.

Keling belaban enggau bala antu nya. Iya ngena jalai ti kepenudi. Dua iti jari iya digenggam ke atas. Kaki iya dilipatka iya. Mata iya merening nuju senaya chelum tungaka mua iya.

“Nama nuan datai mai pemakai lalu nganjung nyawa nuan kitu!” Ku antu nya.

"Antu nadai guna, angkat nuan. Buyan.”

            “Pantaika pengering kita!” (BERSAMBUNG)