SEKADAU NEWs: Enda berasai, hari udah majak tinggi.
Anang ke bulih ngasu, rusa indu udah manjuk lalu
ngujungka iya tesat ba kampung puang. Lebuh iya deka mulaika diri, bekau kaki
pan nadai temu agi.
Keling lalu mutuska penemu bemalam ba babas. Tang sebedau
iya tetemuka bandir pun kayu besai endur ngenduh lalu nyeliahka diri ari jelu
siga, iya deka ngiga sungai. Rekung iya rangkai bai ngenatka aus. Keling mega
deka nerejunka diri lalu berendam ba sungai. Ai sungai sigi chelap amat.
Enda jauh arinya, iya bisi tedingaka
auh ai ti labuh. Sigi manah palan nya. Enti nitihka auh nya, ai sigi labuh ari
endur ti tinggi tauka bisi batu ngempang arus sungai. Keling lalu nuju munyi ai
nya kena muai pengaus sereta meresika diri sepengudah sehari ngasu.
***
Pendai nya palan
endur bala Dayak Iban mandi.
Enda
jauh ari menua nya, enti bejalai kaki kira 7 ngagai 10 minit nuju pendai nya.
Endur pendai nya kira nurun ngagai lebak lalu datai ba tanah landai. Palan
endur sida mandi nya ba lubuk endur pengelabuh ai. Ba lubuknya dalam, mayuh
batu tang enda tajam.
Ba
Panggau Libau, pemandi lelaki enggau indu enda begulai. Kebuah pia laban
nitihka ukum ba adat enda dikemendarka ngintip tauka nengkilaka bala indu
mandi. Sapa ti ditangkap deka ditinggang ukum.
Lebuh mandi, bala indu bekenaka kain. Kain nya
lalu deka ditarit ke atas sebedau nyelam ba ai ti benung anyut. Lalu kain ti
kena begari deka dipanggaika ba atas batu. Sepengudah mandi, kain ti dikena
begari deka dirasuk ari pala dikena malut tubuh sereta disimpulka ba dada.
Maya lemai nya, Kumang mandi ba
pendai begulai enggau bala ti serebak, iya nya Indai Abang enggau Lulong. Siku
lelaki ti baru pulai ngasu tepansaka pendai sida nya. Mata Kumang enggau lelaki
sama beperening pangan diri.
Srrrr!
Keling
asaika dipangka nitar. Iya ngasaika bisi getar ti nyelai lebih ari pangka biau
balai. Ukai mimpi tu. Getar ti nyelainya ngerasuk seluruh tubuh iya, nya ti
ngasuh iya deka nemu tang iya bisi ngasaika pengerawan.
Iya ngasaika diri salah laban udah
tepedaka sida ke indu benung mandi ba pendai. Keling lalu berumban ngelarika
diri mansa pun empelam. Iya lalu begadai ninggalka palan nya. Jantung iya
keketap. Bala indu dara Iban tauka bunsu antu ti benung mandi? Tauka antu baka
ti ditusui Laja?
Indai Abang ti lansik ngasai bisi
utai ti nyelai. Iya lalu berumban ngasuh bakih iya ngerendam tubuh datai ba
taka rekung. Sida tiga indu dara nya lalu betanya pangan diri. Sida mega alit
ati. Sapa mih ti ngemerani nya ngelanggar atur adat?
"Petara
ari Langit!" Ku Lulong.
"Ukai,"
Ku bantah Kumang. "Enti meda ari ulah iya, baka ti enda sengaja mansa
pendai kitai. Engka orang ti enda bulih ngasu tauka orang ti belelang ngiga
jalai pulai laban hari tu nyau deka malam.
“Amat munyi ku nuan nya. Orang nya
engka bujang berani ari Panggau!” Ku Indai Abang
“Mensia ari langit iya nya.”
“Nama nuan arap?” Tanya Lulong.
Sida tiga ti baka bunsu antu mandi
lalu nadai ngetu betalatka senentang sapa lelaki ti baru mansa nya tadi. Sida
alit ati lalu bisi pengasai deka nemu. Enti tuju deka ngintip sida mandi ba
pendai, tentu ga iya enda ngelarika diri. Engka iya meretika amat adat Iban.
“Iya belalauka adat basa, engka iya
bujang berani!” saut Indai Abang. “Baka ukai orang ngapa.”
Indai Abang enda salah pelaba sereta
dibantu pengasai keenam ti dikembuan iya. Iya bisi ngembuan penemu ulih ngabas
utai bukai. Iya mih indu ti ulih ngalahka pengering lelaki ba dunya tu. Ba menua
Panggau Libau, iya baka ti nyadi menteri orang indu.
Keling
enda andalka utai ti dipeda iya. Nyegenda rusa ti dipeda lalu enda ulih
ditangkap pia aja. Kada enda penemu antu jelu tauka gerasi ti deka manjuk lalu
deka nangkap iya.
Iya besemaya, utai ti dipeda iya ba
pendai enda ngasuh iya dikemula kedua kali. Utai ba depan mata engka ukai utai
ti nyata! Engka semina anggap runding aja. Engka semina deka beduan. Iya enggai
dikeduan kedua kali.
Taja mata iya tepereningka tiga iku
indu ti benung mandi ba pendai, tang mata iya betemu perening enggau siku indu ti
pengambis bajik entara sida. Tang Keling ngambu nya semina anggap runding iya
aja. Iya enggai arapka pengasai nya. Engka nya dibai iya kelalu lelak.
BERSAMBUNG
