SEKADAU NEWs: Pagi mansutka
hari ti baru.
Musin kemarau mai angin angat, tang ulih
ngeluruhka daun-daun kering ti bechura kuning labuh ke tanah. Bala jelu
mansutka munyi ingar baka ti nemu hari beganti. Besaut-saut baka munyi tiun
lagu.
Bisi beberapa iku indu utai enggai mansutka
bunyi, agi lembau ngeramakka kukut ba pun kayu kara. Mayuh amat buah agi
engkating ba pun kayu nya. Pemakai pan agi mayuh. Nama kebuah meseti tumu dani
pagi? Seagi bisi sepun kayu kara, nadai penusah deka ngulihka pemakai. Engka
mih ila tusah enti datai maya pun kara nya ditebang tauka mati. Tang kayu kara
nya bisi utai ngibun. Sapa mensia ti berani nebang pun kayu nya.
"St...!" Ku Keling seraya
ngelintangka tunjuk jari iya ba mulut. Laja beratika enggau bebendar.
"Ninga nuan munyi Ketupung?"
"Au bisi!"
"Sepiak mua ke kanan nih?"
"Au"
"Burung manah nya. Aram
bejalai! Kita sigi bulih pemujur."
Keling gaga. Tempik iya bau Laja.
Enggau ati ti naka pengeransing, sida nyingkang nurun ngasu. Lalu sida deka
nemu keni paras gaya bala indu dara ba menua din. Jelayan mega udah nurun dulu
ari Laja anak iya. Iya mih ti ngumbuk
Keling nurun
ngasu rusa ngagai babas. Nya mih pengawa ti naka ngelantangka ati iya.
Jelayan udah masang panjuk. Ngena
penemu berubat iya ti naka peninggi, iya ulih ngereja ngena penemu alus nengah
Apai Sabit Bekait. Apai Sabit Bekait nya bala sida ti udah dibuai ari perintah
menua ketegal nerima ukum ti berat. Iya ngereja pengawa nya ngambika dikena
ngulihka juluk ati iya. Taja pan berambunka nyawa anak iya empu. Amat mih juluk
ati iya nadai ditemu orang bukai.
Nurun mih dua iku bujang nya ngasu
ke babas, baka orang ti ngejangka rumah enggau pemendar ari apai indai. Keling
murih amat ke apai iya Gemuring ti kering, penyigat murihka paras mua indai
iya. Iya mansang besai nyadi anak ti naka penyigat.
Jelu ba babas naka pemayuh. Ari ke
ngerayap ba tanah dataika terebai ba atas. Tang Seduai iya nurun ngasu serak
tu, Keling enggau Laja sigi udah baum nangkap rusa ti ngembuan tujuh tanduk
aja. Seduai iya enda ngena senyata baka sumpit enggau sangkuh. Seduai iya sigi
besemaya nangkap rusanya idup-idup lalu deka ditupi nambahka jelu tupi ba taman
Panggau Libau.
"Dikena nelebaka pengelengkas
belanda, lalu dikena nguji penyikar nangkap jelu siga nya." Ku sadang Keling.
"Sapa ti takut?" Ku Laja
ngelaban.
"Amat ar! Kitai nangkap iya
idup. Ambu baka kitai ti bemain.”
Babas menua Borneo tumbuh bemacham
bansa pun kayu ti bedaun lebat baka ke enda nyagi mata panas tama. Taja pan
kemarau panjai, tanah ba menua nya tetap embab. Burung Ketupung enggau Tiong
engkechit ba dan kayu Adau.
"Tiong, tiong, tiong..."
Burung Tiong menanyi. Nyerumba Keling
enggau Laja ngagai rusa betanduk tujuh bebulu kuning emas.
"Stt...nya iya!" Keling
nunjukka ba siti sukut. Jelu ti diasu ba depan mata. Jelu nya belalai ba babas
repa, nyingitka pending seraya nyengauka rekung sereta ngayanka tanduk tujuh
iya.
Belubah-lubah seduai iya nyubuk. Nusun
singkang enggau naka penyimat ngichaka nadai engekeretik inggar. Makin lama
makin semak. Maya singkang majak semak deka datai, rusa lalu engkechit belanda
ninggalka sida.
Kebendar, pengelengkas rusa nya lari
agi ulih digagai seduai iya. Tang maya jari deka nyapai kaki belakang rusa,
jelunya sikar amat nyilat. Lepas mih jelu diasu Keling. Rusa indu nya baka ti
nundi iya. Ila asai iya!
" Enda mujur ga baru!" Keling
asa. Iya duduk ba selepak bandir sepun kayu. Nyandih dia. Dia iya ngasaika diri
lelak. Nya baru iya tegepang, Keling enda teingatka agi sapa orang ke enggau
iya ngasu maya ngagai rusa.
Laja. Dini iya? Keling kediri ba kampung
puang. Mata panas pan udah chundung. Iya deka berumban ngejangka palan nya lalu
deka ngiga Laja. Iya udah enda ibuhka rusa sikar nya agi.
Keling berumban angkat ari penuduk
iya. Nyelai, rusa nya nadai agi ba depan mata iya. Keling ngagai sereta deka
berumban nangkap iya. Tang rusa baka ti ngelenyeka iya. (BERSAMBUNG)
