Novel Keling Kumang dalam Bahasa Iban (3)

 2

Ba Ujung Rumah  Panggau Libau

 Sepengudah betemu ba pendai maya lemai nya. Keling enda ulih tinduk jenak ngingatka utai ti enggau iya betemu tadi, kada enda antu tauka bunsu antu.

             Pikir iya tusut. Iya ngenang indu ke betemu enggau iya ba pendai tadi. Keling duduk belipat kaki minta ampun, dua piak jari ditangkupka iya, mata iya berai enggau tubuh iya gegetar. Mata iya asaika nganjung pengasai gegetar ngagai dalam tulang.

             Enda patut nya antu! Berupai amat iya takut. Ditambah mega perening mata iya baka ti ngirumkan pachar nyelai, bisi pengasai ngasuh angat baka panchar mata panas ti ngasuh bulu nyeregu. Sigi amat iya indu mensia. Tang sapa sereta ari ni penatai?

             Tanya nya ukai semina ngasuh ngenusutka pikir Keling tang ngasuh iya enda bemunyi. Sepengelama beminggu pekara nya udah nyadi, iya enggai makai. Selangkuh tubuh iya ke besigul ba lengan enggau dada, majak mit. Kulit iya mega puchat. Enda baka suba beresi sereta berupai mirah.

             Gemuring kasih meda pendiau anak iya. Iya enda kempang ati meda anak ti deka nganti iya nyadi tuai rumah Panggau Libau idup merana.

             Iya mikir deka ngangauka Jelayan berandau sereta ngiga jalai mutarka penanggul Keling ngambika pulai gerai baka selama. Iya siku nembiak ti badas, bebasaka orang tuai, sereta ngembuan penyayau ngagai orang bukai.

             “Jelayan.” ku Gemuring. Maya sida sebuat benung bejalai ba rumah panjai seraya beratika pengawa dikereja sida serumah. “Aku gaga amat. Padi ba umai benung kuning sereta deka datai musin ngayau. Aku ngarapka kitai menang belama maya ngayau. Nambahka nya, kitai serumah seruran idup dalam pengelikun."

 "Kenya mih iya ila, baka ti dikedeka kitai."

"Semua tu ari jasa nuan mega,” ku puji Gemuring sambil nempap bau menteri nya.

"Jasa aku? Ah, nadai ngawa nya, ketegal ari iring tuai mih tu."

Ba menua Kenyalang maya nya, nadai siti mengeri ti ulih ngelaban pengelikun menua Panggau Libau. Rayat idup likun sereta lantang bai iring tuai rumah ti pintar nyaga sereta rinduka sida. Iya mih ketuai ti kepenudi makai sepengudah bala rayat iya kenyang.  Lalu ukai pekara ti nyelai, genap taun perayat rumah panjai Panggau Libau majak nambah. Perayat baru ulih nampung ba ujung rumah panjai. 

         Rumah Panggau Libau iya nya siti rumah ti pengambis panjai maya jeman nya enggau pemanjai 70 x 7 panchar api kelasau, tauka 1 km. Dalam nya diwan 160 iku mensia, sida bela diau ba bilik diri empu ti ngembuan pemesai buka 6 meter sereta panjai 18 meter.

         Jelayan mih siti ari kunchi pengelikun rumah panjai Panggau Libau. Iya nya menteri nyaga pengelikun ti angkunka pengawa iya. Ari jasa iya mih, bala munsuh ti deka ngeregau ulih dialahka sida. Iya ngembuan pengingin ti lama udah disimpan sereta asaika enda ulih dinatka agi. Iya bisi niat deka nyadi raja. Iya udah leju nyadi menteri. Bepun ari nya, iya lalu ngatur pelin.

         Enti deka nyadi siti menua ti benung mansang,  mesti disukung enggau pengelikun ti meruan sereta penegap ti entap. Taja pia, kenyau ari Gemuring dichiri nyadi ketuai rumah panjai, Jelayan seruran taluk. Ari nya, Gemuring nadai kala ngasai sanggu enggau penaluk iya.

         Penalam ai ulih disukat, penalam ati mensia nadai siku ti nemu? Jelayan ngelalaika niat ati iya ti deka jampat nganti penuduk Gemuring. Pemedis ati enggau dendam ngagai Keling majak nyadi.

     Iya udah kala dianu, dichabar sereta dikemelika ba mua bala nembiak lalu kelebih agi ba mua indu ti bajik sereta enda dikelala. Pekara nya mih ti balat amat ngemaluka Jelayan. Sepemanjai pengidup iya, nya mih keterubah iya dipejah orang baka ti nadai guna. Lalu pekara nya dikereja anak lelaki tuai rumah sida ti benung bediri ba mua iya diatu. Jelayan deka bejalaikan pelin ti udah diperambuka iya. Iya bejalaika pansik dulu sebedau ngereja pelin nya.

         "Jelayan!" Gemuring enda mukai-mukai negu menteri pengelikun iya. "Lapa ga nuan? Ari tadi nadai bemunyi?"

"Ehm…nadai nenama tuai!" saut Jelayan.

"Nuan baka ti bisi berundingka utai."

"Nadai tuai!" Jelayan irau. Pengelebih ba Jelayan tu, iya nemu belalaika geregayak ati iya. Lalu nyengkaum maya dikemelika ba mua bala nembiak iya enggau indu ti enda temu penatai nya. Maya nya mua iya nadai ngayanka diri asa sereta ransi. Tang dalam ati iya nyimpan dendam.

"Bisi maya aku malas ila," ku semaya iya.

"Nganti timpuh ti patut."

Jelayan seruran nyabar diri nganti maya ti pemadu manah. Diatu peluang udah datai lalu iya enggai ngemasau peluang nya. Jelayan deka nempa jerita tauka petenah senentang Keling ngagai apai iya.

"Tu, Jelayan. Bisi nyelai dipeda aku. Nama nuan bisi ngasaika ulah Keling bisi nyelai diatu?

"Oh... nya mih tuju Tuai mai aku ngelingi rumah panjai kitai. Nadai ga nyelai. Laban gaya pengidup kitai tu amat-amat likun. Undang-undang enggau perintah asai nya bejalai enggau mujur, enti bala tuai enda enggau kiruhka perintah tu pan nadai ngawa... "Jelayan sengaja nabur jaku besayap.

Gemuring ngasaika bisi nyelai mimit ba jaku Jelayan sekali tu. Nama reti jaku iya "Asaika undang-undang enggau perintah bejalai enggau lanchar lalu ketuai enda ibuh kiruhka perintah?"

Taja pia, nyadi siku ketuai ti pintar, iya enggai ngelampat jaku bala nembiak iya sebedau iya tembu bejaku, nambahka agi nya menteri iya. Gemuring semina ninga sereta nelan liur iya aja. Lalu nya ngalitka ati Jelayan.

"Nama jaku aku bisi nyelai pia tuai?"

"Oh nadai, nadai. Tampung cherita nuan!

"Au, nya tuai. Reti ku aku, ketuai udah ngatur perintah enggau manah ari pun. Atur ti gawa, ukai raja. Nyadi ba penemu aku, perintah tu udah ngepunka chara ti manah, nadai ngira sapa raja amat mih atur iya udah mujur, mengeri sigi ulih nyapai juluk: iya nya pengelikun enggau nyediaka perengka guna rayat.

Jelayan sigi landik enti iya bejaku. Leka jaku ti dipilih sereta dikena iya balat narit ati sereta negu ati orang. Berebak enggau nya, tusun ayat ba jaku iya mega ditusun enggau berurun. Kaul iya chukup manah. Pekara ti salah tau nyadi betul. Ba sukut bukai, utai ti betul ulih diubah nyadi salah. Bisi gerama ba selepak batu ba genap leka jaku iya. Ngelamatu, iya ngasaika diri nyadi jari enggau kaki Gemuring sereta nyadika terabai nyaga pngelikun menua Panggau Libau. Bisi datai maya iya badu dikemelika orang agi. Iya mih ketuai, iya mega raja.

     Pengempang keterubah ti meseti ditetak kena nyapai juluk ati, iya nya muai anak lelaki ti nyadi waris menua nya ti benama Keling. Iya deka naburka jaku petenah ngagai munsuh dikena ngulihka juluk ati iya! Jemah ila, enti iya mujur nyadi tuai rumah, iya deka nurunka gela tu ngagai peturun iya, Laja. Penuduk tu deka diempu peturun iya dataika jemah ila. Jelayan deka ngajar orang ti nganti iya chara ngetanka gela sereta penuduk sida.

" Tuai," ku Jelayan. Dua iku pemesai Panggau Libau nya berandau sambil bejalai ngabas rumah sida ti sepemanjai satu kilometer nya. Enda berasai, seduai iya bejalai lalu deka datai ba bilik ti pengambis ujung.

" Sebut mih!”

”Sebedau nya tuai, aku deka minta ampun. Enti nyema sadang penemu aku tu baka ti renjan lalu enda engkeman.” Jelayan ngaga diri bebasa. Ukai baka ulah iya ngelamatu. Ulah iya ti bejaku enggau basa nya ngasuh ati gemuring nangi. Tang iya lalu berumban muai ati nangi nya. Ni nemu Jelayan meri penemu ti badas.

” Baka tu tuai!” ku Jelayan Kakang.

" Sebut mih sadang penemu nuan, anang kakang!”

"Munyi tu tuai!” ku Jelayan bisi kekatat. Enti Gemuring enda ngembuan pikir ti badas, iya tentu ulih nemu penyelai sereta panjuk ari kelis mua Jelayan. ”Aku deka meri sadang, Keling diasuh kitai belelang ngagai menua jauh.Tuju iya ngambika Keling bulih pengeliat ati baka besi sereta ngajar iya reti pengidup.”

Gemuring nagunka pala. ”Ehm. Udah nya?”

”Siku ketuai meseti ngembuan ati ti kering baka besi sereta nemu reti pengidup enti deka megai menua kitai ngambika seruran idup likun.”

 

Gemuring nagunka pala iya baru. Iya ukai semina setuju tang berasai temegah. Badas endar sadang penemu menteri iya nya. Menteri ti manah, iya ulih mantu mutarka penanggul, ukai nyadi penanggul.

"Sepengudah nya?" tanya Gemuring deka nemu mayuh agi.”

"Nuan enda ingatka pekara ti udah disebut aku tadi senentang siku rusa nyelai ti ngembuan tujuh tanduk sereta bebulu emas?"

"Au, ingat aku!"

"Aka Keling sakit ketegal rusa nya! Minta ampun, enti nitihka penemu aku, rusa nya ukai jelu sengapa. Tang antu ti bebaju rusa."

"Udah nya?"

        Jelayan lalu berengkah ngena akal ngerakal iya. "Kitai ngasuh Keling ngiga nya, nyangka nya ujal ari Petara. Engka rusa nya mai tanda Keling ngembuan kuasa sereta pengelandik ti nyelai. Engka rusa nya ulih mai iya nuju menua orang ti ngembuan penemu tau ajih. Lalu pulai ari nya Keling deka ngembuan penemu sereta kuasa ti enda ulih dilaban orang bukai ba dunya tu.”

"Tang aku nangika anak nya enda pulai agi” saut Gemuring.

"Anang rawan tuai! Iya ngembuan penemu ti umbas ke bekal iya nyaga diri empu. Aku udah ngujika pengering iya. Iya udah ngembuan penemu dikena ngeringka diri, lalu enti enda pan iya ulih malu orang ti ngelaban iya. Nya pan udah umbas."

“Ehm..” Gemuring majak andal. Amat nyelai ga pemintar menteri iya siku nya ku ati iya bejaku.

"Anang irau tuai. Anak lelaki aku Laja deka ngulu sereta nyaga iya. Sida sebaka baka kitai, sama besukung lalu sama andalka pangan diri."

 Sadang penemu Jelayan ngasuh Gemuring menerima nya enggau nadai syarat. Engkeman amat penemu iya lalu nya mih kebuah iya diberi juluk "Jelayan Kaki Kuta" ti mai reti "pagar babi" ketegal pengelandik Jelayan muntang amat meti orang ngena jaku enggau ulah iya.

Keterubah iya baka ke manah, tang bisi juluk ati ti jai dalam main politik iya ngulihka kuasa. Jelayan merambu chara dikena iya manjuk Keling ti nyadi pegempang iya ngulihka juluk ati sereta udah ngemaluka iya. Semina iya aja ti nemu perambu nya. Anak iya Laja pan enda nemu perambu iya nya.             

Nyadi mih pelin iya ti deka muai anak lelaki ti nampung penuduk tuai rumah ba Panggau Libau nya. (Bersambung)