 |
| Sampul buku novel KelingKumang dalam bahasa Iban, salah satu yang menyumbangkan rekor MURI ITKK, 5 Agustus 2024. |
Ba menua Gelung.
Seraban bala indu dara nurun
mandi. Bebala mayuh sida bejalai kaki nurun tangga nuju ngagai pendai, seraya
betundi ketawa enggau pangan diri.
Baca kisahan sebelumnya Novel Keling Kumang dalam Bahasa Iban (1)
Randau sida baka bala bukai ke
baru angkat dara. Kumang, Lulong enggau Indai Abang bekenangka senentang lelaki
ti deka nyadika ambai sida ila. Tentu ga lelaki nya bujang berani, tau ajih,
sigat sereta manah budi. Tang ketegal diumbung dataika sida datai kain, bala
indu dara bedau kala bekelala enggau lelaki bukai.
Baka Kumang, iya semina ngelala
apai iya Bujang Sebalu Ngenang. Iya rindu ati meda sengal tubuh sereta mua apai
iya ti kering. Dalam ati, iya dekaka laki iya ila ngembuan pemanah gamal baka
apai iya. Tambah mega, apai iya naka pementas sereta panyayau ngagai iya. Dalam
ati, Kumang asaika lelengauka orang ti enda ditemu iya.
Lemai nya ba pendai, bala indu
dara mandi enggau naka pengaga. Sida melurutka kain ti dikena lalu ngelempaika
ba atas batu. Tubuh sida tama ke dalam ai. Seretai enggau muka kain, sida
bediri, engkunduk lalu ngerendam tubuh naka paras rekung. Kain ti dibuka tadi,
diengkah ba batu begulai enggau kain ti dikena begari. Kain ti udah dikena mega
ditesah sepangudah mandi.
Semina ikan enggau undang ba
sungai mih nemu pemanah liuk tubuh bala indunya. Alus, lichin sereta beresi.
Kulit ti burak sebaka enggau chura bulu rusa ti betanduk tujuh.
“Aku ngetu dulu,” Ku Indai abang
belubah bediri lalu ngambi kain kena iya begari.
“Nama utai diperumbanka nuan?
Kitai tu agi deka mandi?” Ku Kumang.
“Aku pia mih, berasai chelap
bendar!” Saut Lulong sambil ngereguka tubuh iya.
Indai abang enggau Lulong ngambi
gari kena betukar sereta malut tubuh dataika ba kechiak. Tang begian tubuh ti enda
dibalut kain tetap ayan.
“Nama nuan deka nyadi duyung
pia?’ Ku tundi Lulong lalu ngunsai ai ngagai kumang ti bedau angkat ari endur iya
mandi.
“Bedau puas. Enti kita ka pulai
dulu, dulu ga kita niki ke rumah. Lagi aku nitih dudi.”
“Amat nya? Berani?” Tanya Indai
Abang.
Kumang nagunka pala nandaka
setuju sida ninggalka iya. Iya nyabun tubuh ngena bungai Mandi Mala. Ngusuk buk
ke chelum, lurus, panjai baka mayang pinang
lalu disabun iya daun ti ditanam lalu mansutka pupu
baka syampu.
Enda lama udah ditinggal kediri,
Kumang lalu niki ke pantai. Enda lama udah nya, iya udah begari baru. Iya lalu nesah
kain ke udah dikena.
Iya engkundukka tubuh ba sigi
batu besai. Enda Mukai-mukai mata iya tepedaka siku rusa ti bejalai nuju iya
ari dalam babas. O kasih amat rusa nya. Kaki iya gegetar. Pala enggau rekung
iya nyau bepeling. Baka ke kelalu lelak rusanya. Engka digagai orang ti ngasu,
ku Kumang bejaku dalam ati.
Kumang berasai gaga. Iya murus
pala rusa. “O, naka pangasih! Nama nuan digagai orang?”
Baka ti nemu nama utai ke
disebut Kumang, rusanya nguitka iku iya lalu nagunkan pala. Mata iya merening
baka minta dikesinu. Rusa nya ngembuan tujuh tanduk, bulu iya beresi, kuning
emas. Naka pemanah.
“Ehem, mereti aku utai ku nuan,”
Kumang murus pala enggau rekung rusanya.
Pangasai jelu sigi naka panajam,
rusa engkuda. Enda Mukai-mukai iya lenyau ari purus jari kumang. Iya berindik
ba sigi batu lalu engkejuk. Sekali aja iya merejuk, udah datai ba seberai.
Tinggal mih kumang kediri ba endur nya.
Enda Mukai-mukai datai bala ke
ngasu. “Ha…nya rusa ke disidi kitai!” Ku Jelayan nyerauh.
Kumang gegetar meda orang
nyerauh ba mua iya. Iya berumban ngaduka gari iya enggau meruan agi. Iya
mungkukka tubuh lebuh nunga orang ke enda disadang iya panatai nya. Kaki iya
dipeda naka pala patung. Apu naka mih pemadas! Bala ke ngasu andalka iya nya
antu. Rusa ke ngembuan tujuh iti tanduk ti nyaru diri nyadi indu.
“Kada enda nuan tu rusa betanduk
tujuh?” ku Jelayan ngesak.
“Minta ampun, ukai. Aku tu indu
ti datai ari Gelung.
“Bula!” Ku saut Jelayan lalu
ngamangka sangkuh iya ba kening indunya.
Kumang gegetar takut meda orang
ke ngelingi iya, kering sereta kasar. Selangkuh tubuh sida tegap sereta kering
baka apai enggau bala iya. Tang mih apai enggau aya iya bebida ari sida nya.
Taja pan apai enggau aya iya tegap sereta kering, tang mua sida ngembuan
pementas enggau pangelembut amat pan sida lelaki.
Kumang majak takut meda sida
ngema jelu ti ulih sida ngasu. Bisi beberapa iku agi bedarah. Seumur idup,
Kumang enda kala tepedaka darah pansut ari jelu. Takut sereta nyeregu iya meda
semua nya.
“Lengkaka iya!” Enda mukai-mukai
bisi nyawa orang merak.
“Enda patut kita ngaga indu baka
nya aya!” Ku Keling baka ti merak. Iya enda ngelala indu nya. Tang mih iya enda
kempang meda indu digaga kasar baka nya.
“Nama
ku nuan?” Jelayan alit ati. Baru diatu anak betunggal iya ke baka anak mit nya
berani ngelaban iya. Baka ti nyakal iya ba mua indu sereta raban bukai. Jelayan
berasai malu sereta ngasaika diri dikemeli. Naka pemedis ati iya.
“Lengkaka
iya!” Ku Keling bejaku baru. “Alai mupuk dulu kita semua, tauka….”
“Tauka
nama? Ku Jelayan ngelaban.
“Tauka
nuan aya ngelaban aku!”
“Panchar
amat jaku nuan nih!” Ku Jelayan beketup ngeli.
Gidan sereta naka pemalu iya dikemaruhka baka nya.
“Au!”
Ku Jelayan seraya ngenatka ati enggau dendam iya. Jelayan nayuk raban ngasu
iya. “Aram pulai kitai!”
Sepengundah
Jelayan enggau bala ke ngasu mupuk, tinggal mih indu nya enggau Keling ba endur
palan nya kediri seduai iya. Kumang merening Keling. Perening mata gaga enggau
beterima kasih.
Keling
beratika mata indu nya. Bisi pangasai nyelai ngerayap ngerasuk tubuh iya.
Sekumbang iya udah idup, bedau kala iya betemu enggau indu ngemajik nya. Kada
enda amat ku aya Jelayan, indu tu bunsu rusa betanduk tujuh ngembuan bulu burak
sereta kuning emas.
Indu
nya mega tekait ati. Iya enda kala betemu enggau lelaki laban ke diumbung. Tang
ari jerita apai iya, iya kala ninga bisi lelaki kering, sigat sereta manah ati.
Perening mata iya tajam tang enda kasar.
“Angkat
mih! Ari ni panatai nuan?” tanya Keling.
Mata iya enda mindah merening
tubuh badas ba mua iya. Lekuk tubuh naka pemanah. Betis iya baka batang padi
ngandung. Pah iya burak baka batu ilau. Punggung iya mipau baka lekuk sape.
Dada iya baka sepasang bukit. Rekung iya panjai baka ruas. Enggau perening mata
iya! Taja pan gegatar takut, tang tetap mancharka pemanas ti nyelai. Keling
asaika bemimpi.
Entara
pangasaika mimpi tauka ukai, indunya berumban angkat. Lalu ngelarika diri baka pangelaju
kilat sereta enda nyalah baka rusa. “Nganti dulu!” Ku Keling nguji nagang.
Tanya
iya lalu bedau disaut, indunya lalu ayas ari mata iya. Keling ngusuk mata iya.
Nguji beratika pekara ti baru udah nyadi tadi. Dalam ati iya nanya diri empu:
amat kini iya betemu enggau antu? Tauka bunsu antu ti nurun mandi? Tauka iya
nya semina indu ngapa ari rumah panjai Gelung ti nurun bemain ba pendai?
Tauka……………… (bersambung)
