Novel Keling Kumang dalam Bahasa Iban (13)

 

SEKADAU NEWs - SEKADAU: Keling bebendar ngiga batu lichin nya. Ba malam ti petang tegayam, entara ruai ti panjai sereta luas, panchar ari api kelasau enda ulih dikena iya ngiga utai ti sepemesai jari tunjuk ba dalam lupung iya. Iya udah bebendar nyagam. Lalu ngena semua penemu, iya tetap enda tetemuka batu lichin nya.

Dalam iya bebendar sereta berumban ngiga batu lichin nya, Keling tepalikka kibung ba sepiak iya. Iya nemu Laja nadai agi gali ba peninduk. Kada enda Laja udah enchuri batu lichin iya lalu ngayap indu dikingin ati iya ti udah disabung kenyau ari dalam kandung. Tusah tu!

Ba dalam pangking, kumang nganti enggau ati ti keketap. Asaika lama amat deka datai ke tengah malam. Iya udah nyediaka selambar daun sirih enggau sesirap pinang dikena nyadika tanda nerima orang bujang nya.

“St……!” aka Kumang udah meri tanda enggau ngemuncungka mulut tanda enda ngasuh inggar. Kebendar, iya enggau Laja sepakat. Enti deka muka pintu ti ditambit ari dalam sigi enda muntang. Meseti deka muka ari atas daun pintu, sereta meseti deka ngembuan pengelandik. Nya baru ulih muka tutup pintu ti ditambit ngena palang.

Sepakat mih aka Kumang enggau Laja tengah malam nya. Ukai Keling tang Laja ti deka ngayap Kumang. Kelimpah ari ngembuan ati ninding sereta bingking ngagai Kumang, seduai iya mega bisi sempekat. Sempekat politik dikena ngelabuhka orang bukai sereta ngulihka penuduk enggau reta pengaya sigi udah dikembuan mensia kenyau ari kelia.

Pengawa ngayap nya meseti deka diatur enggau naka penyimat ngambika enda ditemu orang bukai. Maya bejalai, tapa kaki nyingkang pan meseti deka belubah, bediri pan betunjik ngena ujung jari kaki. Lebuh muka pintu pan meseti belubah lalu enda ulih inggar, nangika didinga apai indu sereta dianu lalu ditinggang adat.

            Laja bejalai betunjik nuju ngagai pangking Kumang. Aka Kumang udah nunggu ba dia. Enti deka muka pintu ari dalam meseti ngembuan lengan tu panjai ngambika ulih nyapai palang ba dalam. Aka Kumang engkunduk, punggung iya nyadi tangga dikena Laja niki. Iya udah nguji niki enggau naka penyeremat tang nai tubuh iya jayar, iya labuh ari punggung aka Kumang. Maya malam hari, anang ke nya munyi orang labuh, jarum ti labuh ba jerami pan ulih didinga.

            Begau mih sida sepintu bilik. Apai Kumang lalu angkat deka meda nama utai ti nyadi. Iya lalu nangkap Laja enggau aka Kumang. Seduai iya pan lalu diukum.

Ba dalam bilik, ngena penemu ti dikembuan iya, Keling udah tama ngagai bilik nya. Lalu maya muka pintu pangking Kumang, Bujang Sebalu tetemuka Keling enggau Kumang duduk berimbai.

            Seduai iya ti betemu nya ketegal dibai ati ti sama keranka pangan diri lalu disebut “pengerindu bebungai” tauka “bejarum-jarum”.  Seduai iya pan lalu diatur Bujang Sebalu ngena adat betunang baka ti udah disempekat enggau Gemuring maya ngiga buah empelam.

            Maya nya Gemuring udah nyerahka duku dikena nyadika tanda anak seduai udah disabung betunang.

            Seduai iya ti udah disabung betunang kenyau ari dalam kandung udah betukar sekeping sirih enggau sesirap pinang. Tang nya deka ditegapka ngena adat ari apai enggau indai seduai iya.

”Kumang,” apai iya meda mua anak iya enggau naka penyayau. ”Indai nuan Bajik Amai udah nadai sepengudah nuan ada. Nuan diatu udah dara. Nama nuan amat udah nyikap diri nyadi indai ngagai bala anak nuan empu?”

Kumang enda tepansutka jaku. Ati gaga enggau sinu nyadi siti. Bisi pengasai ti ngasuh ati iya begetar.

"Au apai!” saut Kumang. Ia nagunka pala.

''Besaksika bala ti datai, aku setuju seduai jadi melaki bini.”

Bala ti datai nunga bela gaga magang. Ukai semina sida sebilik aja ti gaga, tang sepemanjai menua Gelung mega gaga. Lalu hari seduai iya jadi mega ditetapka nyadi hari melah pinang.

(BERSAMBUNG)