Novel Keling Kumang dalam Bahasa Iban (10)

 

SEKADAU NEWs - SEKADAU: Gemuring nitihka nama utai ti dipinta adi iya. Bajik Amai deka ngaga sepasang gerunung. Gemuring nadai dipadahka iya tuju gerunung nya.

            Seduai pan lalu ngiga buah engkala enggau muntang ketegal buah nya genap tiga taun sigi lebat bebuah. Genap pun buah ti ditanam sigi bebuah magang, enda ngira buah ti ulih diempa tauka enda ulih diempa.

            Bansa Dayak nyamai deka nemu bagi buah ti ulih diempa enggau ti enda tau diempa sereta bisi rachun. Muntang chara iya. Sida deka beratika buah nya diempa jelu tauka enda.

            Engkala tu sebansa buah ti dikedaka bala jelu. Ukai semina jelu baka kesindap, tang mega dikerinduka jelu ti bisi empat kaki.

            Seduai menyadi ngiga buah engkala enggau naka pengaga. Seduai iya tetemuka buah nya ti udah mansau labuh ari dan iya

”Rindu amat,” ku Bajik Amai. Iya ngumpul buah engkala lalu ditepu iya ba dalam tungkin, “Peda nuan, penuh tungkin aku!”

 Enda mukai-mukai, "Amai!" ku Gemuring nyerauh. "Lengkaka tungkin nuan lalu niki!"

            Bisi seraban babi kampung datai. Raban babi nya dipeda kelalu lapar. Ari munyi, sigi ditemu babi nya datai deka makai buah engkala ti ngara ba tanah.

            Taja pan Bajik Amai dipeda baka siku indu ti ayun lundai, tang maya tasah iya baka penyikar bujang berani. Gemuring ulih nyaga diri empu enggau adi iya.

Enggau lengkas, iya ngelengkaka tungkin ti penuh enggau buah engkala. Raban babi nya tadi nyerang sereta makai buah nya enggau tumam. Sepengudah leju makai buah engkala, babi ti ngembuan taring panjai mansutka bunyi nekus sereta bunyi ti ngenakutka. Babi nya lalu malik ke atas. Pun kayu ti endur iya niki disungkur bala babi nya.

"Takut!" iya nyabak gegetar ba atas pun kayu. Gemuring agi belaban enggau bala babi nya ti sepenyampau 12 iku. Tiga udah dibunuh iya. Agi tinggal 9 iku.

 Sepengudah lama belaban, Gemuring udah ngerejaka 8 iku babi nya bakal. Semina siku aja ti kebal. Sangkuh Gemuring bingkuk kena ba tulang belakang babi nya. Pengebal babi nya amat baka tau ajih.

Sangkuh Gemuring enda ulih dikena agi, iya pan semina ngelaban babi nya ngena jari puang aja. Sekali iya nyerang, babi nya lalu nyerudu Gemuring. Iya enggau lengkas belanda lalu nangkap babi nya. Babi nya tadi lalu engkechit sereta meruek enggau naka pengingar "wekkk!".

Maya babi engkechit, Gemuring lalu ningkap. Enda lama udah nya, babi nya lalu terujak ba tunggul tebelian ti tajam. Mengkang enda engkebut ba kayu tebelian baka ti udah disikap deka ditunu.

             "Nurun!" Ku Gemuring madahka menyadi iya. Bajik Amai meda Gemuring belaban enggau babi nya tadi. Iya mimit da deka labuh ari pun kayu bai tubuh ti gegetar meda aka iya belaban enggau raban babi. Enda salah baka ba amfiteater maya jeman Romawi kelia maya siku nembiak belaban enggau jelu siga.

            Maya iya ngindikka kaki ba tanah, Bajik Amai nyabak. "Bisi pedis nuan aka!"

"Anang irau," ku Gemuring ngelantangka ati adi iya. "Nadai apa nama aku!"

            “Tang..." ku Bajik Amai seraya iya nunjukka lengan aka iya. "Bisi darah pansut!"

"Semina telih mimit. Ukai digigit tang semina diurik duri aja.”

Ba endur palan nya mayuh amat duri. Enda berasai jari iya diraut duri maya belaban enggau babi nya tadi. Ba endur nya mega bisi daun pasak bumi. Bajik Amai ngambi daunnya ti agi muda. Lalu dikunyah iya. Udah alus dikunyah, iya lalu ngena daun nya ngunsut abi telih aka iya. Darah ti pansut lalu ngetu. Telih iya ti udah rangkai enda lama sigi deka gerai.

"Aram pulai tua!” ku Gemuring. "Enda lama agi babas tu deka petang.”

"Keni ke buah engkala kitai?”

"Anang ngambi nya, teda babi enda manah. Uji nuan nunggu dulu, aku ngambika nuan ba pun enti deka dibai pulai.”

                        Gemuring ngambi rangkang kayu. Dipatahka iya ngena jari. Lalu diempalungka iya ke atas pun engkala. Labuh 2 leka engkala ti setangkai. Nyelai, dua leka engkala enda beserara.

Gemuring ngumpul buah engkala ti sepasang nya. Seduai iya pan lalu berumban pulai. Tangkin Bajik Amai mega ditinggalka ba endur nya aja. Enda dibai pulai ketegal udah charik dibinsaika bala babi tadi.

Maya pejalai seduai mulaika diri, seduai baum enda nusuika pekara ti udah nyadi ngagai orang bukai, nyengkaum apai enggau indai seduai iya. Seduai iya sigi bendar dianu enti orang nemu nama utai ti udah nyadi.

Pekara ti berebut buah engkala enggau seraban babi lalu ngalahka babi ti tau ajih nya sigi seruran dikingatka Gemuring belama. (Bersambung)

 

            Bajik Amai mega kenya. Iya sigi seruran ngenang diri ti gegetar nganti ba atas pun kayu. Taja pan iya takut, tang berupai amat pengering anak lelaki ayan ba mua aka iya maya belaban enggau jelu siga. Iya muji pemerani aka iya nya.